दिपक दुलाल,पौष २५
पाँचथरको फाल्गुनन्द गाउँपालिका वडा नं.१,नवमीडाँडामा नागरिक आरोग्य  कार्यक्रम तथा वडास्तरमा नागरिक आरोग्य समूह गठन कार्यक्रम आज सम्पन्न भएको छ ।
मेरो स्वास्थ्य मेरो जिम्मेवारी भन्ने नारालाई सर्थक पार्न आम नागरिकलाई शारीरिक, मानसिक र अध्यात्मिक रुपमा स्वस्थ एवम सबल बनाई विश्वव्यापी रुपमा फैलिदै गएको सर्ने तथा नसर्ने रोगको प्रकोपलाई न्यूनिकरण गर्ने उद्धेश्यले कार्यक्रम सञ्चालन गरिएको हो ।

कार्यक्रममा स्वस्थ जीवनशैलि,योगासन,प्रणयाम,ध्यान,सकारात्मक जीवनशैलि,स्थानीय जडिबुटीको परिचय, प्रयोग, रोपण एवम संरक्षण साथै आयुर्वेद स्वास्थ्य संस्थाबाट प्रदान गरिने सेवा लगायतका विषयमा छलफल भएको थियो ।
फाल्गुनन्द गाउँपालिका आयुर्वेद तथा वैकल्पिक चिकित्सा शाखा फाक्तेप पाँचथरले आयोजना गरेको कार्यक्रममा वडाका जननिर्वाचित प्रतिनिधीहरु,विभिन्न विद्यालयका प्रधानाध्यापकहरु,संघसंस्थाका प्रतिनिधीहरु,महिला स्वास्थ्य स्यमसेविकाहरु,आमासमूहका                 पदाधिकारीहरु, समाजसेवी, बुद्धिजिवी, सञ्चारकर्मी लगायत ३५ जनाको सहभागिता रहेको थियो । 

कार्यक्रमको सहजीकरण फाल्गुनन्द गाउँपालिका आयुर्वेद तथा वैकल्पिक चिकित्सा शाखा प्रमूख बरिष्ठ कविराज निरिक्षक राजु पराजुली, बरिष्ठ कविराज निरीक्षक राम कृपाल यादव, बरिष्ठ बैद्यहरु राजकुमार श्रेष्ठ र प्रमोद कुमार यादवले गर्नुभएको थियो ।
फाल्गुनन्द १,नवमीडाँडाको वडाकार्यालयको सभाभवनमा सम्पन्न कार्यक्रम फाल्गुनन्द १,का वडाध्यक्ष होम प्रसाद आङ्देम्बेको अध्यक्षतामा  सम्पन्न भएको थियो ।